Kosblik 26 Junie 2017: Maalvleis met lensies

Kosblik 101

Spyskaart

Maalvleis met lensies in volkoringpitas (aangepas uit Cooking from the heart 3 )
Vars avokado en babaspinasie
Pink Lady® appel

Maalvleis is een van daardie veelsydige bestanddele wat in vele geregte en geure opgetower kan word. Dink maar net aan herderspastei, lasagne, op ‘n gebakte patat, in ‘n pannekoek vir die winter en so kan die lys aangaan.

‘n Basiese maalvleismengsel is iets wat ek baie gereeld sommer in groot hoeveelhede maak, vries en gereed hou vir ‘n vinnige ete. En as daar genoeg is vir aandete en iets vir die volgende dag se kosblikke, maak dit dinge soveel makliker.

Die skoolvakansie begin aan die einde van die week en vandag se maalvleismengsel is sommer regte lekker koesterkos vir die winter. Dis ‘n resep wat vir die reeks Cooking from the heart resepteboeke ontwikkel is. Met hierdie resepte word mense aangemoedig om gebalanseerd en voedsaam te eet en dit ‘n leefstyl te maak. As jy ‘n paar basiese beginsels volg en lekker resepte het om as basis te gebruik, dan is dit regtig nie moeilik om op die manier te leer kook en eet nie. Baie mense maak die fout om te dink dit is duur of vaal en vervelig om gesond te kook en te eet, maar met ‘n resep soos hierdie een, kan jy maar weet – met ‘n paar basiese bestanddele jy gaan lekker en voedsaam kan eet. http://www.cookingfromtheheart.co.za

Die maalvleis word in hierdie resep met soortgelyke bestanddele gegeur as vir ‘n tipiese bolognese-mengsel, die geurige Italiaanse maalvleis met tamatie en geurmiddels. En ja, daar is baie maniere om maalvleis gaar te maak en hier is nog ‘n lekker weergawe. Gerasperde wortels gee ‘n soeterige smaak aan die mengsel en is ‘n lekker balans met die tamaties, wat soms nogal suur kan wees. Vars of droë kruie kan gebruik word en gemaalde koljander is altyd lekker met maalvleis.

Om die mengsel ‘n interessante aanslag te gee, word rooi lensies saam met die maalvleis gekook. Die Droëbone Produsente Organisasie het ‘n verskeidenheid lensies en bone wat deel is van die reeks produkte wat hulle help verbou en bemark. Dit word ook onder verskillende handelsmerke in die winkels verkoop. Lensies en bone is bekend daarvoor dat dit ‘n goeie bron van vesel en ook proteïene is, so as jy dit op lekker maniere in jul etes insluit, dan maak dit die ete sommer meer voedsaam ook. Lensies en ander peule hou jou ook langer versadig, so dit help om die glisemiese indeks (GI) van die ete laag te hou – dit beteken dat hierdie tipe bestanddele sal help om jou bloedsuikervlakke langer stabiel te hou en beter te bestuur. http://www.beans.co.za

Lensies hoef nie soos droë bone eers geweek te word nie en kook ook aansienlik vinniger gaar. Rooi lensies is selfs gouer as bruin lensies gaar, sommer in 20 minute, en verander van die helder-oranje kleur na ‘n ligter kleur sodra dit gaar is. As jy sukkel om lensies in jou gesin se etes in te sluit, omdat jou kinders dalk nie daarvan hou nie, is hierdie die ideale resep, want die gaar lensies word baie goed deur die wortels en maalvleis gekamoefleer. Ek het hierdie resep al voorheen met dubbel die hoeveelheid lensies en vloeistof gemaak en dit baie suksesvol as vegetariese ete gebruik.

Vir vandag se kosblik word die maalvleismengsel in ‘n volkoringpita geskep. En om seker te maak dat die ete gebalanseerd is, kan klein spinasieblaartjies en skyfies avokado ook in die pita gesit word. Besluit hoe groot die gesinslid se ete moet wees en pak ‘n hele pita met die maalvleis vir ‘n groot ete in of dalk net ‘n halwe vir ‘n ligter ete of vir ‘n kind. Onthou dat porsiebeheer altyd belangrik is, selfs met bv gesonde keuse soos volkoringbrood, moet ons seker maak dat ons nie te veel koolhidrate eet nie.

Seisonale bestanddele is altyd lekker om deel te maak van ‘n mens se etes. Dis beslis geuriger wanneer dit daardie spesifieke produk se seisoentyd is en dis dan soveel makliker bekombaar, soos nou met Pink Lady® appels. Dis ‘n heerlike sappige, kraakvars appel en die perfekte peuselhappie om iewers deur die loop van die dag te eet. Leer ook jou kinders om hierdie lekker appels sommer met die skil aan te geniet, want dit is juis waar heelwat van die voedingswaarde van die mooi vrug sit. Dis beslis my kinders se gunstelingappel.

Die boere wat hierdie mooi pienk appels verbou doen baie moeite om seker te maak dat die vrugte die regte balans tussen sonlig en koue nagte kry, want dit is juis wat hulle so ‘n mooi blos en die heerlike smaak gee. Pink Lady® appels word ook langer aan die boom gelos om ryp en geurig te word – beslis nie sommer net nog ‘n appel nie. http://www.pinklady.co.za/

Elke week is die ATKV deel van #Kosblik, met ‘n mooi uitdrukking of woord wat hulle borg. Dink nou maar net aan vandag se woord, ‘koesterkos’, dis so ‘n beskrywende woord wat wonderlike herinneringe vir elkeen oproep. Koester, beteken om versorg en vertroetel te voel en ja, kos kan ‘n mens beslis so laat voel. En as jou ma of iemand naby aan jou die kos gemaak het, is dit mos daardie een wat jou met ‘n lekker bord kos koester. Dis vir my wonderlik om in Afrikaans te kan kook en ons moet ons kinders hierdie mooi woorde leer, sommer so in die kombuis en aan tafel. Gaan kuier ook by een van die ATKV-Oorde en eet heerlike koesterkos in hul #Koswerf-restaurant as deel van jou winterfamilievakansie of -naweek. http://www.atkvoorde.co.za

Resep

Maalvleis met lensies

Resep aangepas uit Cooking from the heart 3
Lewer 6 porsies

4 t (20 ml) olyf- of avokado-olie
500 g maer bees- of volstruismaalvleis
2 uie, gekap
250 g sampioene, gekap
2 wortels, grof gerasper
2 t (10 ml) gedroogde gemengde kruie of 30-45 ml gekapte vars kruie van jou keuse
1 t (5 ml) gemaalde koljander
2 t (10 ml) aangemaakte mosterd
1 x 410 g-blik gekapte tamaties
½ k (125 ml) sterk Rooibostee
½ k (125 ml) rou rooi lensies
suurlemoensap en swartpeper na smaak

1. Verhit die helfte van die olie oor matige hitte in ’n groot braaipan (AMC 24 cm Fry Pan werk goed). Braai maalvleis tot goudbruin en skep uit.
2. Verhit die res van die olie in dieselfde pan en braai uie en sampioene tot sag. Roer die wortels by en braai nog ’n paar minute.
3. Roer die gedroogde kruie, koljander, mosterd, maalvleis en tamaties by. Verlaag die hitte en prut oor lae hitte met ’n deksel vir 20 minute.
4. Roer tee en lensies by en prut nog 20-30 minute of tot die lensies sag is. Die rooi lensies sal van helder-orange na ‘n ligte orange verander as dit gaar is. Geur met suurlemoensap en peper.
5. Gebruik die maalvleis vir aandete of pak dit in ’n kosblik met volkoring-pitabroodjies, vars slaaibestanddele en baba-spinasieblare.

Wenk: los die maalvleis uit en gebruik 250 ml rooi lensies en 250 ml Rooibostee en berei die resep verder net soos hierbo voor. Prut die lensies vir 20-25 minute en sit die mengsel as vegetariese ete voor.

Kosblik 19 Junie 2017 - Lensieslaai en appelballetjies

Kosblik 101

Spyskaart

Lensie-en-kruieslaai met tamatie, voorgesit met oorskiet-braaivleis
Pink Lady® appelballetjies

Dis eksamentyd! Ek onthou nog baie goed hoe lus mens raak vir peusel as jy so agter die boeke sit. As Ma is dit nou vir my belangrik dat daar vir my kinders iets meer as net soetgoed is, wanneer daardie lus hulle beetpak. Kinders se breine moet beslis in die eksamen so helder as moontlik wees, en dan is suiker beslis nie ideaal nie. Dit kan hul dalk vir ‘n rukkie energiek laat voel, maar suiker is ook ongelukkig bekend daarvoor dat dit mens minder helder kan laat voel – en dis die laaste ding wat enige een in die eksamen nodig het.

Die peuselhappies wat ek vir vandag maak, is ‘n idee wat ons al voorheen op #Kosblik gebruik het. Dit was so gewild, dat ek nou graag hierdie weergawe ook wil deel. Ek het so ‘n paar ander bestanddele gekombineer, maar die basis bly steeds vars Pink Lady® appels wat met rou hawermout, speserye en neute gemeng en dan in balletjies gerol word.

Pink Lady® appels is van nature soet genoeg dat ‘n mens dit vir baie meer as net ‘n peuselhappie kan gebruik. Die soet appels is heerlik bros en baie sappig, wat dit ideaal maak vir iets soos hierdie appelballetjies. Die kombinasie van neute, vars appel en sade beteken dat dit propvol vesel is, wat jou energievlakke langer gebalanseerd gaan hou, as die suiker wat in sjokolade of ander lekkers is en jou bloedsuikervlakke vinnig kan laat wipplankry. Porsiebeheer bly natuurlik nog belangrik, maar ‘n houer vol van hierdie balletjies is beslis beter om aan te peusel as ‘n stafie oorsoet sjokolade. Onthou om appels met die skil te gebruik. Dit gee sommer ‘n ekstra bietjie kleur aan die balletjies en is juis ‘n belangrike deel van die voedingswaarde van ‘n appel.
http://www.pinklady.co.za

Om seisonale produkte, soos die appels te gebruik, is ook deel van die filosofie wat in die reeks resepteboekies van Cooking from the heart gebruik word. Hoe meer vars bestanddele en hoe minder verfynde of hoogs-geprosesseerde produkte gebruik word, hoe gesonder eet jy en jou gesin heel waarskynlik. Dit is ook nie moeilik om dit te doen nie. Soms verg dit net so ‘n bietjie beplanning, veral as dit by kosblikke kom.

Die lensieslaai vir vandag se kosblik, was oorspronklik as bygereg in die resepteboek voorgesit. Bygeregte kan soms juis die gereg wees wat ‘n gewone ete in iets interessant omskep. Of dalk is jy opsoek na nuwe idees om bietjie minder ‘wit stysel’ te eet en dan is hierdie ‘n heerlike alternatief. Stysels soos rys, pasta of aartappels het dikwels ‘n baie hoë koolhidraatinhoud, sonder dat daar baie ander voedingswaarde in die gereg is nie. As dit met iets soos hierdie lensieslaai vergelyk word, is daar reeds ander voedingswaarde, teksture en kleure ook ingesluit. ‘n Paar eenvoudige bestanddele kan ‘n heerlike kombinasie wees, wat met redelik min moeite voorberei kan word. Kyk gerus na die webwerf as jy nog sulke idees soek. http://www.cookingfromtheheart.co.za

Terwyl ons nou oor lensies gesels… Die Droëbone Produsente Organisasie het ‘n wye reeks bone en lensies wat deel vorm van hul produkreeks. Hulle moedig ons ook aan om peule en bone gereeld deel te maak van ons etes. Droëbone, hetsy in hul droë of geblikte vorm, is van nature ryk aan vesels, laag in sout en bestanddele wat jou kan help om jou bloedsuikervlakke beter te bestuur. Die vesels in die bruinlensies in vandag se slaai, kan jou juis langer versadig hou en is daarom ‘n goeie keuse vir ‘n kosblik.

Lensies hoef nie soos bone eers geweek te word voor dit gekook word nie. Dit kook ook heelwat vinniger gaar, soortgelyk aan die kookproses vir rys. Rooi lensies kook selfs nog vinniger gaar. As jy regtig haastig is, is geblikte lensies ook redelik maklik bekombaar, maar die wat jy self kook, het dikwels ‘n lekkerder tekstuur. Bone en lensies het ‘n redelike neutrale smaak en kan die geure in ‘n gereg baie suksesvol absorbeer, wat dit juis geskik maar vir ‘n wye verskeidenheid van geure, van speserye tot kruie en ander vars bestanddele. Daar is nog heelwat inligting hieroor op http://www.beans.co.za

Sit die slaai met braaivleis of ‘n geroosterde hoender iewers deur die loop van die naweek voor en maak genoeg dat daar vir Maandag of Dinsdag se kosblikke ook iets oorbly. Sit dit sommer met oorskiet braaivleis in die kosblik en in ‘n oogwink hetj y ‘n voor vir ‘n gebalanseerde ete ingepak.

En so gepraat van steak. Ja, ons het dit almal as ‘n Engelse woord geleer, maar dit is een van daardie woorde wat nou al heeltemal aamvaar en erken word in Afrikaans. Net nog ‘n bewys dat ons mooi taal gemaklik by moderne neigings kers vashou en voordurend nuut bly. Woorde soos kruisskyf en lendeskyf is wel die Afrikaanse woorde wat na ‘rump’ en ‘sirlon’ verwys, maar die oorkoepelende woord om na steaks te verwys, is standaard in beide tale.

Die ATKV oorde se nuwe Koswerf-restaurante doen ook baie moeite om op hul spyskaarte suiwer Afrikaans te gebruik en daar is selfs ‘n paar prettige maniere om na geregte te verwys. Die verskillende steaks op die spyskaart bly van die gewilde items en selfs daar word in breë na steaks verwys. Gaan loer gerus daar in as julle weer op ‘n oord kuier en maak sommer hier ‘n bespreking http://www.atkvoorde.co.za

Resepte

Lensie-en-kruieslaai met tamatie

Resep aangepas uit Cooking from the heart 3
Lewer 6 porsies

1 k (250 ml) rou bruin lensies
½ t (2,5 ml) sout
1 takkie vars roosmaryn of lourierblaar
1 e (15 ml) gedroogde gemengde kruie
1 knoffelhuisie, heel
2 t (10 ml) olyf- of avokado-olie
3 ryp tamaties, in blokkies gesny
3 e (45 ml) gekapte vars pietersielie
3 e (45 ml) gekapte vars origanum of meer pietersielie
suurlemoensap en swartpeper na smaak
½ komkommer, in blokkies gesny
⅔ k (160 ml) bevrore ertjies, afgespoel

  1. Plaas lensies, sout, roosmaryn, gedroogde kruie en knoffel in ’n kastrol met 2½ k (625 ml) water. (‘n AMC 20 cm Low is ideaal.)
  2. Bring oor matige hitte tot kookpunt, verlaag die hitte en prut met ’n deksel vir 30 minute of tot die lensies net sag is. Dreineer deeglik.
  3. Verhit olie in ’n braaipan (AMC 24 cm Chef’s Pan werk uitstekend) en soteer tamaties tot net sag. Roer dit met die vars kruie by die lensies.
  4. Geur na smaak met suurlemoensap en peper. Laat afkoel en roer komkommer en ertjies by. Sit as a slaai of bygereg met ‘n vleisgereg van jou keuse voor.
Pink Lady® appelballetjies

Lewer ongeveer 18-20 balletjies

60 g (125 ml) gekapte rou makadamia-neute
75 g (125 ml) gekapte rou amandels
2 Pink Lady® appels, met die skil aan grof gerasper
3 e (45 ml) lynsaad
2 k (500 ml) rou gerolde hawermout
1 t (5 ml) gemaalde gemengde speserye
⅓ k (80 ml) gedroogde rooi bosbessies of rosyntjies
1 t (5 ml) vanieljegeursel

  1. Meng die twee soorte neute saam in ’n voedselverwerker tot dit amper soos ’n neutbotter lyk.
  2. Voeg die appel en die res van die bestanddele by die neutmengsel en meng tot dit amper soos koekiedeeg lyk.
  3. Rol eetlepelsvol van die mengsel in balletjies en pak in ’n lugdigte houer. Bêre in die yskas vir 3-5 dae.

Kosblik 12 Junie 2017: Groentesop

Kosblik 101

Spyskaart

Vinnige groentesop
Pink Lady® appel
Avokado
Neute

Vir baie kinders is dié tyd van die jaar dalk ook eksamentyd en juis dan, is gesonde etes belangrik. Voedsame kos wat ‘n kind se brein kan help om helder te dink en te fokus is beslis nie te versmaaie nie. Kos uit elke voedselgroep is beslis noodsaaklik en ‘n mens kan maar seker maak dat daar genoeg omega 3 en ander belangrike vette in die hele gesin se etes. Dit is tipies ook ‘n spanningsvolle tyd, so hoe meer krag en woema jou lyf het, hoe beter funksioneer jou brein ook.

Die ideaal is ook dat kinders so min as moontlik suiker, verfynde stysel en geprosesseerde kosse eet. Hierdie beginsels is ook saamgevat in die resepte en wenke uit Cooking from the heart, om ‘n gesonde leefstyl prakties te maak.

Om iets uit elke voedselgroep by elke ete in te sluit, is nie so moeilik nie. Soms verg dit net ‘n bietjie beplanning, maar kyk ook na dit wat julle deur die loop van ‘n dag eet, om seker te maak dat al die voedingselemente ingesluit is. Soms eet ‘n mens meer by een ete as ‘n ander en deur die loop van ‘n dag is daar wel ‘n goeie verskeidenheid kosse en voedingswaarde in jul etes. Party kinders is nie lief vir groente soos murgpampoentjie of spinasie nie, maar met hierdie sop, kan jy dit maklik wegsteek, omdat die sop verpulp word.

Hierdie sop is een van dié uit Cooking from the heart se tweede resepteboek (http://www.cookingfromtheheart.co.za). Dis heerlik vullend en ook voedsaam, omdat daar iets uit elke voedselgroep sommer in een bakkie ingesluit word. Die vloeistof waarin dit gekook word en wat die basis van die sop vorm, bevat ook heelwat minder sout as ‘n gewone aftreksel. Met die regte kombinasie van bestanddele en die feit dat sommige van die groente eers gesoteer word, hoef jy geensins vir geur in te boet nie. Etes moet ook nie so swaar wees, dat ‘n kind aan die slaap wil raak na ‘n ete nie, en hierdie sop is ewe lekker vir aandete of as ‘n maaltyd wanneer die kinders van die skool af kom en moet studier.

Jy kan besluit hoe ver jy die bestanddele wil verpulp of fyndruk, na gelang van jou gesin se voorkeur. Danksy al die groente en bone in die sop, is dit ook nie nodig om dit met brood voor te sit nie, so kies liewer ‘n gesonde olie, soos avokado of ‘n skeut olyfolie om bo-op te sit. As die bestanddele redelik ver verpulp word, kan die sop selfs met groot sukses gevries word. Maak dus genoeg, dat jy porsies daarvan kan vries om weer vir ‘n volgende kosblik- of middagete te ontdooi.

Om die sop te verpulp, het ‘n mens vroeër dalk ‘n versapper of voedselverwerker gebruik. Deesdae is stokmengers baie gerieflik om te gebruik en ‘n aansienlik praktieser opsie. Die mooi Afrikaanse woord, stokmenger, is baie beskrywend van hoe die kombuisapparaat lyk en is dan ook die woord wat die ATKV hierdie week borg. ‘n Stokmenger, (nie ‘n ‘dzz-dzz-masjien’, soos baie mense dit noem nie) kan direk in ‘n kastrol gebruik word en is makliker om te was, as ‘n voedselverwerker. Deesdae is daar selfs modelle waarvan die gedeelte met die lem kan afskroef, wat dit nog makliker maak. Die ATKV is beslis nie net bekend vir hul vakansieoorde vir die hele gesin nie, maar ook vir die belangrike kultuursake waarby hulle oral oor die land betrokke is. http://www.atkvoorde.co.za

Bone is die proteïen in vandag se sop en pas heerlik saam met al die groente en die effense soet smaak van die appels en patat in die sop. Die Droëbone Produsente Organisasie voorsien ons van ‘n wye verskeidenheid bone en lensies om in verskillende geregte te gebruik. Bone moet eers geweek word voor die vir ‘n redelike lang tyd moet kook om sag te word, maar die geblikte weergawes maak dit moontlik om selfs in ‘n vinnige sop, soos hierdie, bone te gebruik. Bone is vullend en propvol vesel, is laag in sout en ‘n baie bekostigbare bron van proteïen en dus ‘n goeie alternatief vir vleis.

Ons het al voorheen gesels oor van die Kosblik-resepte wat ook vir sopkombuise of skole se voedingsprojekte geskik sal wees. Hierdie is beslis weer een van daardie resepte, want dit is nie duur om te maak nie, kan in groot hoeveelhede voorberei word en is voedsaam en vullend. http://www.beans.co.za

Appels is ‘n baie gereelde item in menige kosblikke. Dis maklik om in te pak, meeste kinders hou daarvan en dit is ‘n ideale peuselhappie gedurende die dag. Daar is wel ook vele ander maniere om appels deel te maak van ‘n mens se etes. Wanneer appels in seisoen is, soos die Pink Lady® appels wat nou oral beskikbaar is, kan ‘n mens dit op baie maniere gebruik.

Pink Lady® appels is bekend vir hul bekende pienk wange, soet smaak en bros tekstuur. Hierdie appel is by uitstek geskik om mee te kook en pas by verskillende geure. Dit is die perfekte manier om ‘n natuurlike soet smaak aan die sop te gee. Die appels hoef nie eers geskil te word nie, want die skil bevat heelwat van die voedingswaarde en aangesien die sop verpulp word, kan dit maklik deelgemaak word van die sop. Pink Lady® appels hang langer as ander appels aan die boom, om seker te maak dat hulle genoeg sonlig en hitte (of koue in die nagte) kry, om hul kenmerkende soet smaak en mooi blos te ontwikkel. Geniet dié pragtige appel op verskillende maniere die seisoen. http://www.pinklady.co.za

Resep

Vinnige groentesop

Resep aangepas uit Cooking from the heart 2
Lewer 6 porsies (1,5 liters)

1 e (15 ml) olyf- of avokado-olie
1 ui, fyngekap
2 selderystingels, gekap
2 murgpampoentjies, in blokkies gesny
1 patat met die skil, grofgerasper
2 Pink Lady® appels met die skil, grofgerasper
4 k (1 liter) water
1 x 410 g-blik botterbone, gedreineer
½ t (2,5 ml) sout
1 t (5 ml) gedroogde tiemie
100 g broccoli, in blommetjies gesny
2 spinasieblare, in repe gesny of geskeur
1 t (5 ml) aangemaakte mosterd
suurlemoensap en swartpeper na smaak
2 e (30 ml) gekapte vars pietersielie

  1. Verhit olie oor matige hitte in ‘n groot kastrol (gebruik ’n AMC 24 cm High). Braai ui tot sag en voeg seldery en murgpampoentjies by. Soteer vir nog ‘n paar minute en roer die patat, appel, water, bone, sout en tiemie by.
  2. Prut met ‘n deksel vir 15-20 minute of tot die patat en appel gaar is.
  3. Voeg broccoli, spinasie en mosterd by en geur met suurlemoensap en peper. Prut nog 10 minute of tot die broccoli net gaar is. Verpulp met ‘n stokmenger so fyn soos jou gesin dit verkies of druk effens fyner met ‘n aartappeldrukker.
  4. Geur na smaak met nog suurlemoensap en peper, indien nodig. Roer pietersielie by en sit warm voor.

Wenke
1. Sit sop met ongegeurde jogurt, meer vars kruie of ‘n paar druppels olyfolie voor.
2. Geur sop volgens jou keuse. Speserye soos paprika, komyn en garam masala of kerriepoeier sal ook lekker wees.
3. Roer oorskiet-hoender of vis by die sop vir ’n meer vullende ete. Enige ander gaar bone kan ook bygevoeg word.

Kosblik 5 Junie 2017: Vark-kebabs en boneslaai

Kosblik 101

Spyskaart

Vark-kebabs met Pink Lady® appels (resep uit Cooking from the heart 1)
Witbone-slaai met feta en songedroogde tamaties

Die sinergie van kosgeure bly vir my een van die lekkertes van eet. As twee bestanddele mekaar aanvul tot ‘n selfs geuriger smaak, het jy nie veel meer op jou bord nodig vir ‘n genotvolle ete nie. Sommige bestanddele is alombekend daarvoor dat dit mekaar komplimenteer, dink maar net aan vis en suurlemoen of tamatie en vars basiliekruid. Die spreekwoord sê mos ook, dit pas soos vinkel en koljander.

Hierdie week se resepte is juis weer iets wat vir aandete gemaak kan word. Berei sommer van die begin genoeg dat dit vinnig is om later ‘n kosblik te pak. Varkvleis en appel word dikwels saam in ‘n resep gebruik, omdat die natuurlike soet smaak van die appel baie lekker is saam met die vleis. Suurlemoen is ‘n geurmiddel wat uitstekend by albei bestanddele pas en wanneer appel in ‘n sout gereg gebruik word, is tiemie ideaal. Vark en tiemie is ook ‘n bekende kombinasie, so as hierdie elemente alles saam gebruik word, is dit sommer nog lekkerder, sonder dat dit ‘n gekompliseerde resep hoef te wees.

Die beginsel van ‘n sinergie van geure is ‘n praktiese aspek van ‘n gesonde leefstyl. As eenvoudige kombinasies mekaar aanvul en reeds lekker is, het jy min ander bestanddele nodig om dit verder te geur. Deur só te kook, vind jy dikwels dat jy minder sout of dalk ander ongesonde bestanddele hoef by te voeg om ‘n gereg lekker te maak. Die vleis word in ‘n mengsel van suurlemoen en kruie gemarineer en jy sal vind dat jy minder sout nodig het as jy suurlemoen op vleis gebruik, so moenie in die versoeking kom om te veel sout op die vleis te sit nie.

Die gaarmaakmetode wat vir ‘n gereg gekies word, speel ook ‘n groot rol in die geur daarvan. Verder is dit belangrik om nie kos oorgaar te maak nie, want dan gaan baie van die geur en dikwels ook die voedingswaarde verlore. Dink maar aan oorgaar groente of vleis: dis vaal en smakeloos. Vandag se kebabs kan dalk vir ‘n naweek-ete oor die kole gaargemaak word of braai dit ewe suksesvol in ‘n pan, maar maak seker dat die varkvleis nie droog word nie en steeds sappig is. Dis juis ook van die beginsels in Pharma Dynamics se reeks resepteboekies Cooking from the heart – om seker te maak dat kos se natuurlike geure en voedingswaarde so goed as moontlik behoue bly. Die resepteboekies het ook heelwat praktiese wenke en idees om jou werk in die kombuis makliker en effektiewer te maak en ‘n gesonde leefstyl vir die hele gesin haalbaar te maak. Laai gerus die boekies hier gratis af http://www.cookingfromtheheart.co.za.

Pink Lady® appels is nou in seisoen en die perfekte keuse vir hierdie kebabs. Die appels het van nature ‘n heerlike sappige soet smaak en pas uitstekend by die ander geure in die gereg. Verder is dit ‘n appel wat maklik op ‘n stokkie ryg, sonder dat die blokkies breek. Wanneer die appel gaargemaak word, behou dit wel die struktuur baie goed. Dis nogal belangrik vir iets soos hierdie kebabs, want ‘n appel wat maklik blus as dit gaar word, sal van die stokkies afval en ‘n redelike onaptytlike eindresultaat lewer. Pink Lady® appels verloor ook nie heeltemal hul kleur as dit gaar is nie, so dit laat die kebabs nog mooier vertoon ook. Hierdie soort appel is ook ewe lekker om in soet en sout geregte te gebruik en beslis meer as net ‘n peuselhappie in ‘n kosblik. http://www.pinklady.co.za

‘n Voedsame kosblik moet beslis gebalanseerd wees, met iets uit elke voedselgroep. Die kebabs word hierdie week met ‘n vinnige boneslaai voorgesit en jy kan byna enige slaaibestanddele waarvan jou gesin hou, hiervoor gebruik. Die bone is vir hierdie ete deel van die stysel, in plaas van iets anders soos aartappels of brood, wat dalk dikwels ingepak word. Gerieflikheidshalwe gebruik ek ‘n blikkie witbone. Maak seker dat die bone goed gedreineer is en onthou om nie die vloeistof uit die blik weg te gooi nie – vries dit en gebruik dit later as aftreksel in ‘n wintersop of -bredie.

Droëbone Produsente Organisasie (http://www.beans.co.za) doen baie moeite om verbruikers bewus te maak van al die maniere waarop bone in etes gebruik kan word. Bone is van nature hoog in vesel en omdat dit ‘n neutrale smaak het, kan dit met ‘n verskeidenheid ander bestanddele en geure gekombineer word. Dis veral lekker om bredies en soppe in die winter mee aan te vul en is ‘n bekostigbare bron van proteïen en koolhidrate. Bone kan ook as bygereg of slaai gebruik word, so dit is regtig veelsydig.

Vandag se slaai word met feta en songedroogde tamaties gemaak, so moenie in die versoeking kom om sout oor die slaai te sit nie. Die bone word in soutwater ingemaak en die feta is redelik sout. Die gemarineerde tamaties is ook baie geurig en jy kan sommer die marinade as slaaisous gebruik, so dis vinnig, maklik en geurig.

As die wintermaande op ons kalenders begin, is daar ook binne ‘n paar weke die vooruitsig van ‘n lang skoolvakansie. Vir baie mense is dit ‘n kans om as gesin bietjie tyd saam te spandeer en dalk te kan weggaan. As jy kans kry om hierdie jaar weg te gaan en beplan om by ‘n ATKV-oord te gaan ontspan, loer gerus ook in by die Koswerf-restaurant op die oord. Daar is iets op die spyskaart vir elkeen in die gesin en selfs ‘n paar nuwe geregte, spesiaal vir die vakansie. http://www.atkvoorde.co.za

Die ATKV borg weer hierdie week vir ons ‘n woord, alhoewel dit eintlik meer as net ‘n woord is, maar ‘n baie mooi uitdrukking. Die ‘sinergie van geure’ is soms nét die beskrywing wat jy nodig het as twee of meer bestanddele ‘n ontploffing van geure in jou mond word. Die woord sinergie verwys na die beginsel dat 1 + 1 gelyk is aan meer as 2. Die geheel is dus groter as die som van die enkele dele. Ek hoop dat dit gereeld waar is in jou kombuis.

Resepte

Vark-kebabs met appel

Resep aangepas uit Cooking from the heart 1
Lewer 4 – 6 porsies

2 e (30 ml) suurlemoensap
2 e (30 ml) olyf- of avokado-olie
2 e (30 ml) gekapte vars tiemie of origanum
½ t (2,5 ml) sout
swartpeper na smaak
500 g varkboud of -skouer, oortollige vet verwyder en in blokkies gesny
1 rooi soetrisse, ontpit en in stukkies gesny
1-2 Pink Lady® appels met die skil aan, ontpit, in agstes gesny en elk gehalveer

  1. Meng die suurlemoensap, olie, kruie, sout en peper saam.
  2. Plaas die vleis in ‘n mengbak en bedek met die marinade.
  3. Marineer vir 30 minute tot 1 uur.
  4. Ryg vleis, soetrissie en appelblokkies op kebabstokkies. Braai oor matige kole en verf die kebabs met van die marinade terwyl dit vir 8-10 minute braai of tot net gaar – die vleis moet steeds sappig wees en die appel net gaar. Die kebabs kan ook oor matige hitte in ‘n pan gebraai word.
Witbone-slaai met feta en songedroogde tamaties

Meng die volgende bestanddele saam vir ‘n vinnige slaai wat as stysel vir ‘n maaltyd of kosblik geniet kan word. Dreineer 1 x 410 g-blik witbone en meng met ’n skyf feta, in blokkies gesny; 6-8 gemarineerde songedroogde tamaties, in repies gesny; ’n groot handvol roketblare of ander kruie van jou keuse en sonneblomsade. Gebruik die tamatie-marinade as slaaisous, indien verkies of gebruik ‘n skeut olyfolie as slaaisous.

Kosblik 29 Mei 2017: Bobotie-frikkadelle

Kosblik 101

Spyskaart

Bobotie-frikkadelle
Slaaibestanddele, bv soetrissie, broccoli, mielies
Geroosterde neute-&-sademengsel
Ongegeurde jogurt met JAZZ™ Appel

Vandag se kosblik het twee resepte, wat beide goeie voorbeelde is van hoe maklik dit is om ‘n bekende resep met ‘n verandering hier en daar, in iets nuuts te omskep. Die spyskaart is beslis weer, net soos al die vorige kosblikke wat tot op hede beplan en gepak is, gebalanseerd, vullend en voedsaam, met iets uit elke voedselgroep.

Een van die praktiese kosblik-beginsels waaroor ons al baie gesels het, is beplanning. As daar iets is wat jy vir aandete kan gebruik of vooraf in groter hoeveelhede kan maak, is helfte van die werk klaar gedoen. Dan hoef jy dit letterlik net in te pak.

Die frikkadelletjies is ‘n heerlike aandete en kan met groot sukses gevries word, so maak beslis genoeg. Ons het al ‘n hele paar keer van te vore frikkadelletjies gemaak, maar hierdie keer is die geurmiddels weer op ‘n ander manier lekker interessant, sodat jou gesin gaan voel asof hulle iets nuuts in hul kosblikke kry. Die geurmiddels is soortgelyk aan dié wat in ‘n bobotie gebruik word. Dis eintlik so ‘n eenvoudige idee om bietjie verandering teweeg te bring, maar tog nie iets wat mens dikwels doen nie.

Met die reeks resepte uit Cooking from the heart, het jy ‘n goeie basis van gesonde, maklike en bekostigbare resepte vir die hele gesin en met ‘n verandering of twee hier en daar, behoort jy meer as genoeg idees te hê om kosblikke te kan pak. Die resepte word gereeld op Kosblik gebruik of effens aangepas, as dit ‘n gewilde resep is wat almal geniet of wat ons al voorheen gebruik het. http://cookingfromtheheart.co.za/

Die resep wat wel vandag uit Cooking from the heart gebruik word, is die geroosterde neute-&-sademengsel. Die oorspronklike resep het ander speserye gebruik, maar om dit juis vir vandag se spyskaart ideaal te maak, is dit met ‘soeter’ speserye soos kaneel, gerooster. Jy kan dieselfde resep met ander speserye van jou keuse ook maak, bv komyn, gerookte paprika of selfs ‘n tikkie kerriepoeier.

Neute en sade is ‘n belangrike deel van ‘n kosblik, want behalwe vir die feit dat dit op verskillende maniere gebruik kan word, is dit ‘n uitstekende bron van gesonde olies. Hierdie olies is belangrik vir goeie breinfunksie, mooi naels, hare en vel. Gebruik die neute as peuselhappie, met ontbyt, sprinkel dit oor geroosterde groente of ‘n slaai. Of peusel daaraan as jy laatmiddag begin honger voel. Onthou om met rou, ongeroosterde neute te begin, want dan is daar nie onnodig baie sout op nie en kan jy beheer hoe lank dit gerooster word. Hoe langer neute en sade aan hitte blootgestel word, hoe meer van die gesonde olies gaan verlore. Die aromatiese speserye maak dit onnnodig om sout daarop te sit. Maak sommer ‘n groot hoeveelheid van die neutemengsel en hou dit in ‘n lugdigte houer vir nog ‘n paar dae se kosblikke of as peuselhappie by die huis.

Appel en kaneel is ‘n bekende kombinasie en juis daarom is die neute heerlik saam met JAZZ™ Appels wat nou in seisoen is. Die soet appels is lekker bros, het ‘n verfrissende smaak en is sommer baie veelsydig, want saam met die jogurt en neute, is dit ewe lekker vir ontbyt, nagereg of as peuselhappie. Sny die appel, met die skil aan, in blokkies en pak in lagies met ongegeurde jogurt en die neutemengsel, of pak alles apart in en meng dit wanneer dit geëet gaan word.

Onthou om ongegeurde jogurt te gebruik, want vooraf-gegeurde jogurt bevat dikwels onnodig baie suiker. Die soet JAZZ™ appel en soeter speserye is meer as genoeg om die gevoel van ‘n versoete jogurt te gee, maar is heelwat gesonder. Die kombinasie is selfs ideaal vir mense wat sukkel om vroegoggend ontbyt te eet. Pak die appel, jogurt en neute in om later deur die oggend te geniet. http://jazzapple.com

‘n Frikkadelresep kan op verskillende maniere gemaak word. Daar word dikwels brood of hawermout in die mengsel gebruik, om dit saam te bind. Dit word egter nie in hierdie resep gebruik nie, om dit geskik te maak vir diegene wat verkies om nie brood te eet nie. Die bindwerk word dan met ‘n eier gedoen, en soos in heelwat vorige Kosblik-insetsels, gebruik ons Nulaid se eiers. Hier gaan die eier ‘n belangrike rol speel om die mengsel ook saam te bind wanneer dit gebraai word, dus gebruik ek ‘n ekstra-groot eier. Die eier dra natuurlik ook by tot ekstra voedingswaarde in die frikkadelletjies. Daar is nog heelwat praktiese idees en resepte op Nulaid se eie webwerf, gaan besoek dit gerus. http://www.nulaid.co.za/

Bobotie is beslis een van daardie eg Suid-Afrikaanse geregte. Vir baie mense is dit ‘n gereg waaroor hulle sommer nostalgies sal raak. Daar is vir elkeen ‘n ‘onthoukos’ uit hul kinderdae of dalk iets wat ‘n familie-tradisie geword het of wat jy met ‘n ouma, ma of tannie assosieer. In Afrikaans is daar ook baie mooi woorde vir sommige van die bekende SA geregte en baie van hulle word nie eers regtig in Engels vertaal nie. Dink maar net aan bobotie, vetkoek, braaibroodjies, roosterkoek of slaphakskeentjies, smoorsnoek en nog vele meer. Die ATKV is baie opgewonde oor die feit dat mense nog steeds daardie kosterme ken en gebruik en moedig ons aan om dit ook vir ons kinders te leer. Die ATKV se nuwe Koswerf-restaurant op elke oord, bied ook ‘n paar bekende Suid-Afrikaanse geure op die spyskaart aan. Soms wel in ‘n nuwe gedaante of dalk soos jy dit onthou op ‘n Sondag of vir ‘n ete van die dag. Gaan eet gerus daar en geniet dit wat op die spyskaart aangebied word. http://www.atkvoorde.co.za/

Resepte

Geroosterde neute-&-sademengsel

Resep aangepas uit Cooking from the heart 2
Lewer 6 porsies

200 g rou, ongesoute neute en sade, bv. amandels, makadamias, pampoen- en sonneblomsaad
1 e (15 ml) olyf- of avokado-olie
1 t (5 ml) gemaalde kaneel
½ t (2,5 ml) gemaalde gemengde speserye
’n knippie neutmuskaat

  1. Voorverhit die oond tot 180 °C en voer ’n bakplaat met bakpapier uit.
  2. Plaas al die bestanddele in ’n mengbak en roer tot goed gemeng.
  3. Plaas neutemengsel op bakplaat en rooster vir 10-15 minutes of tot liggies goudbruin. Meng neute een of twee keer gedurend die tyd deur. Hou dop dat die neute nie brand nie.
  4. Laat heeltemal afkoel en sit ongeveer ⅓ k (80 ml) per persoon voor as ‘n peuselhappie. Of sit met ongegeurde jogurt en JAZZ™ Appels, in blokkies gesny, vir ontbyt, nagereg of as peuselhappie voor.
Bobotie-frikkadelle

Resep aangepas uit Kos is op die tafel!
Lewer 4 – 6 porsies

500 g maer beesmaalvleis
2 knoffelhuisies, gekneus
1 klein ui, fyngekap of gerasper
1 ekstra-groot Nulaid eier
10 ml (2 t) kerriepoeier
10 ml (2 t) gemaalde koljander
10 ml (2 t) gedroogde gemengde kruie
5 ml (1 t) gemaalde komyn
5 ml (1 t) suurlemoensap
10 ml (2 t) appelkooskonfyt of heuning
30 ml (2 e) gekapte koljanderblare
sout en varsgemaalde swartpeper na smaak
20 ml olyfolie om in te braai

  1. Plaas maalvleis in ’n groot mengbak en breek met ’n groot vurk uitmekaar. Voeg orige bestanddele, behalwe die olie, by en meng goed deur, gebruik sommer jou hande.
  2. Geur na smaak en rol in klein frikkadelletjies.
  3. Verhit intussen helfte van die olie oor matige hitte in ’n groot braaipan (’n AMC 24 cm Chef’s Pan werk uitstekend). Verbruin die frikkadelle in sarsies, aan beide kante tot goudbruin, maar nog nie gaar nie.
  4. Verlaag hitte en sit die deksel op. Prut frikkadelle 5-8 minute of tot net gaar. Herhaal met orige frikkadelle. Sit as deel van ’n aandete voor of pak in ’n kosblik.

Kosblik 22 Mei 2017: Appel-en-piesangmuffins

Kosblik 101

Spyskaart

Geroosterde hoenderdye en botterskorsie
Appel-en-piesangmuffins
Groente, bv suikerertjies en soetrissies
Waterbottel

Almal hou van ‘n soet bederf of ietsie gebak, want dit is soms net die ding wat jou deur die dag dra of dalk ‘n manier om iets te vier. Maar as jy probeer om ‘n gesonde leefstyl te volg, sukkel jy soms om iets te maak wat by die beginsels van dié eetgewoontes pas. Vir die reeks Cooking from the heart resepteboekies, wat deur Pharma Dynamics ontwikkel is, moes ons ‘n paar slim planne beraam om dit reg te kry. Die uitdaging was juis om vir mense te wys dat dit moontlik is en hulle te help met maklike, bekostigbare resepte wat vir die hele gesin lekker is.

Wanneer jy die uitstekende besluit geneem het om gesonder te eet, wil ‘n mens juis steeds lekker eet, sodat jy dit kan geniet en volhou. Suid-Afrikaners is dol oor gebak, dit sien ons gereeld met die bakresepte op Kosblik. Ongelukkig bevat die resepte dikwels heelwat suiker wat nie ideaal is nie. As ‘n mens dus met ander bestanddele, dieselfde soet smaak kan kry, maak dit dinge net soveel makliker.

Vir hierdie appelmuffin-resep uit die tweede Cooking from the heart resepteboekies, word appelpuree en piesang gebruik om steeds ‘n lekker sagte tekstuur te gee. Gebak het ook dikwels baie verfynde koolhidrate in, so ons het verder probeer om die veselinhoud en dus voedingswaarde van die muffin beter te maak as een wat net met koekmeel en baie suiker gemaak word. Deur met bestanddele te werk wat mekaar se smake en teksture aanvul, sal jou gesin nie eers weet dat daar nie suiker in is nie. Speserye en vanieljegeursel is heerlik saam met appel en piesang en ideaal om te kombineer.

Die muffin is die soetbederf vir die ete en sommer ook ‘n gedeelte van die stysel (koolhidrate) vir die ete. Daarmee saam is daar oondgeroosterde hoenderporsies en botterskorsie ingepak. Dit kan sommer die vorige aand se aandete wees, wat die inpakwerk soveel makliker maak. Maak dus genoeg met aandete, om ook ‘n kosblik of drie daarmee te kan pak. Daar is nie regtig ‘n resep vir die hoender en botterskorsie nie, maar as jy idees wil kry om dit op ‘n maklike en gesonde manier te geur en te rooster, laai gerus nog van die Cooking from the heart resepte met die skakel af. http://cookingfromtheheart.co.za/

Met al die kosblikke wat ek al gepak het, bly dieselfde beginsels belangrik - hou dit vullend, gesond en gebalanseerd. Om hierdie kosblik verder te balanseer en seker te maak daar is iets uit elke voedingsgroep, kan jy nog groente inpak. Iets soos suikerertjies, komkommer of soetrissie is lekker hierby. Gesonde olies is ook noodsaaklik, so jy kan ‘n halwe avokado saam met die ander kos inpak of ‘n handjievol neute deel maak van die kosblik.

Vir vandag se appelpuree, het ek JAZZ™ appels gebruik. Die appels is nou in seisoen en dit het van nature ‘n verfrissende en pikante, soet smaak met ‘n stewige tekstuur. Die rooi skil met groen-geel strepe maak dit maklik om die appel uit te ken. As peuselhappie deur die loop van die dag, is die appel regtig lekker en maklik om in ‘n kosblik te pak. En terwyl dit in seisoen en vollop is, is dit ‘n heerlike appel om vir later in die jaar te ‘spaar’ en ‘n puree daarvan te kook. Die appels maak ‘n sagte, amper romerige puree en is van nature soet. ‘n Kaneelstokkie wat saam met die appel gekook word, gee dit sommer nog ekstra geur vir die gereg waarin jy dit gaan gebruik. Onthou net om dit uit te haal voor jy die appels verpulp.

Moenie die appels afskil voor jy dit prut nie, dis meer moeite en heeltemal onnodig, want daar is baie voedingswaarde en vesel in die skil en dit kook ook sag en word deel van die verpulpte mengsel. Moet ook nie in die versoeking kom om suiker by te voeg as jy dit kook nie. ‘n Bietjie suurlemoensap verhoed dat die appels verkleur en bring die natuurlike smaak na vore. Die puree is dus soet genoeg om as plaasvervanger vir suiker in die muffinresep te dien. Vries die puree in ysbakkies en keer dit dan later in ‘n groter houer uit. Of vries dit in die porsies soos jy dit gaan nodig kry om in ander geregte te gebruik. Dis heerlik in maalvleis of ‘n bredie met ‘n tamatiebasis, waarby mens soms ietsie soets wil voeg om die tamaties se suurheid te neutraliseer. http://jazzapple.com

Alhoewel ek die pitte van ‘n appel graag met ‘n skerp groentemessie uitsny, om so min as moontlik van die ‘vleis’ te verloor, onthou ek dat my ouma altyd ‘n appelboor gebruik het. Daarmee het sy ‘n groot genoeg holte gemaak om die appels met ‘n vulsel van dadels, neute en speserye te vul en dit dan so in die oond gebak vir ‘n nagereg. ‘n Appelboor, het ‘n lang metaalgedeelte, wat aan die voorkant skerp gemaak is, sodat dit deur die stronk en pitte kan druk om dit uit te haal. Appelboor, is vandag se Kosblik-woord van die week, wat soos gewoonlik, deur die ATKV geborg word. Die maatskappy het verskeie projekte waarby hulle betrokke is, om ons mooi taal te bevorder.

Die ATKV is ook bekend vir ses baie mooi vakansieoorde wat deur die land is en dit bly vir baie mense ‘n gewilde bestemming vir ‘n gesinsvakansie. Die opgegradeerde restaurante op die oorde, Koswerf, spog ook met ‘n spyskaart met ewe mooi Afrikaanse geregte en benamings op die spyskaart. Gaan eet en kuier beslis daar wanneer jy weer op ‘n oord is. http://www.atkvoorde.co.za/

En dan kan ‘n mens min gebak sonder eiers voorberei. Vir hierdie muffinresep gebruik ek twee van Nulaid se groot eiers om die res van die bestanddele saam te bind. Die eiers word eers vooraf geklits, sodat dit makliker is om met die piesang, puree en ander vloeistowwe te meng. ‘n Muffinbeslag moet so min as moontlik geroer word, so as die eiers byvoorbeeld net oor die mengbak gekraak en ingeroer moes word, sal dit nogal lank neem om seker te maak dat die eierwit en –geel deeglik ingemeng word. Dit kan die beslag onnodig swaar maak, wat die tekstuur van die muffins ook sal affekteer. Alhoewel die eiers in ‘n soet gebak gebruik word, bevat dit steeds voedsame proteïene. Die proteïene in eiers is veral belangrik vir gesonde spiere, hare, vel, naels, bene en organe. Dis vullend, maar laag in kilojoules en dus ideaal as deel van ‘n gesonde manier van eet. Onthou om die eierdoppe vir jou komposhoop te gebruik en dit nie weg te gooi nie. Lees hier nog oor Nulaid se eiers en slim maniere om dit te gebruik. http://www.nulaid.co.za/

Resep

Appel-en-piesangmuffins

Resep aangepas uit Cooking from the heart 2
Lewer 12 muffins

Appelpuree (lewer 250 ml)
4 JAZZ™ appels, met die skil in blokkies gesny
¼ k (60 ml) water
2 t (10 ml) suurlemoensap
1 kaneelstokkie

Muffins
½ k (125 ml) volkoringmeel
½ k (125 ml) koekmeel
½ e (7,5 ml) bakpoeier
1 t (5 ml) gemaalde kaneel
1 k (250 ml) grofgerasperde JAZZ™ appels, met die skil
½ k (125 ml) voorbereide appelpuree
1 groot ryp piesang, met ’n vurk fyngedruk
2 groot Nulaid eiers, geklits
6 e (90 ml) sonneblomolie
1 t (5 ml) vanieljegeursel

  1. Appelpuree: Plaas appels, water, suurlemoensap en kaneelstokkie in ’n kastrol. Bring oor matige hitte tot kookpunt en prut tot sag. Dreineer die vloeistof, maar hou dit eenkant. Verwyder die kaneelstokkie en verpulp die appels met ‘n stokmenger tot glad. Voeg ‘n bietjie van die behoue vloeistof by, indien dit nodig is om dit nog gladder te maak.
  2. Muffins: Voorverhit die oond tot 180 °C. Smeer ’n muffinpan liggies met olie.
  3. Meng al die droëbestanddele saam en roer die gerasperde appel deur. Meng die res van die bestanddele saam.
  4. Roer dié mengsel by die droë-mengsel tot ’n gladde beslag vorm. Moenie te veel roer nie.
  5. Skep beslag in die muffinpan en bak 25-30 minute of tot ‘n toetspen skoon uitkom.
  6. Laat afkoel op ‘n afkoelrakkie. Sit 1-2 muffins per persoon voor.

Wenke
1. Enige orige appelpuree kan gevries word. Gebruik vir nog ‘n baksel muffins of om ’n soutgereg soeter te maak, sonder om suiker te gebruik. Dis heerlik in ‘n sop, bredie of maalvleisgereg.
2. Roer ⅓ k (80 ml) gedroogde rooi bosbessies of rosyntjies by die muffins.

Kosblik 15 Mei 2017: Voupakkies met roereier

Kosblik 101

Spyskaart

Voupakkies ( wraps ) met roereier, sampioene en spinasie
JAZZ™ Appel
Vars tamaties
Neute

Roereier is beslis nie net vir ontbyt nie. Dis ‘n maklike manier om ‘n kosblik-ete vullend en voedsaam te maak én dis vinnig om voor te berei. Roereier kan ook op verskillende maniere ingepak en voorgesit word vir ‘n kosblik. Vir vandag se kosblik sit ek dit in ‘n voupakkie voor, met gesoteerde sampioene en spinasieblare. Ons het al vir ‘n vorige kosblik-idee met voupakkies iets lekker gemaak – dis die mooi Afrikaanse woord vir ‘n wrap.

As ek roereier maak, reken ek gewoonlik op twee groot eiers per grootmens en een eier per kind of drie eiers vir twee kinders, sodat daar genoeg is vir almal. As jy met ekstra-groot eiers werk, het jy beslis net een eier per kind nodig en dalk selfs net drie vir elke twee volwasse porsies. Op Nulaid se webwerf is daar lekker praktiese inligting oor die verskillende groottes eiers wat in hul reeks beskikbaar is. Ek verkies om water in ‘n roereier-mengsel te gebruik en nie melk nie, omdat die melkproteïen soms vinniger as die proteïen in die eier stol en dit kan laat voorkom of die eier taai of rubberig is. Die verhouding water tot eier is wel belangrik – moenie meer as 15 ml (1 eetl) per eier gebruik nie, sodat dit sagte roereier maak, maar nie droog is nie. Te veel water word uitgestoot sodra die eier begin gaar word en dit kan baie waterig en onaptytlik wees. http://www.nulaid.co.za/

Die ander elemente wat saam met die roereier gebruik word, kan afgewissel word soos julle daarvan sal hou. Soetrissie, ui of ander groen groentes soos broccoli kan ook lekker wees saam met die eiers. Vir hierdie resep is ‘n ontbyt-idee uit Cooking from the heart se tweede resepteboek, nou as ligte middagete gebruik. Onthou om altyd die res van die dag se etes ingedagte te hou wanneer ‘n kosblik gepak word. En dan moet die ete beslis ook gebalanseerd wees en iets uit elke voedselgroep insluit. Vir hierdie kosblik is daar dan ‘n vars JAZZ™ appel en neute ingepak om dit kleurvol te hou. Die neute kan ook as peuselhappie later geëet word en dit is altyd ‘n goeie bron van gesonde olies. Avokado is nou in seisoen en ‘n baie goeie bron van die noodsaaklike olies en sal heerlik wees as deel van die ete. ‘n Halwe avokado kan selfs in plaas van die voupakkie gebruik word, want dit pas perfek by eier en die groentemengsel. Al die elemente kan dan net saam ingepak word, aangesien die avokado vullend genoeg sal wees saam met die res.

Cooking from the heart se aanslag is juis om ons almal aan te moedig om ‘n gesonde leefstyl te volg en so veel as moontlik met vars bestanddele kos te maak. As dit die basies van ‘n mense se etes vorm, sluit jy op ‘n redelike maklike manier meer voedingswaarde in jou etes in en vermy sommer ook onnodige en versteekte sout, suiker en onnatuurlike preserveermiddels. http://cookingfromtheheart.co.za/

Die appel wat deel is van vandag se kosblik, is ‘n kraakvars JAZZ™ appel. Dit het ‘n kenmerkende rooi blos met geel-groen strepe en is ‘n baie lekker sappige appel – perfek vir ‘n kosblik. Dit kan deel wees van die maaltyd of later deur die dag as peuselhappie geniet word. Daar is deesdae heelwat nuwe appelkultivars op ons winkelrakke beskikbaar en elkeen het sy eie unieke geur, so probeer gerus dié nuwe variëteit. Onthou om jou kinders van kleins af te leer om appels met die skil aan te eet, want die meeste voedingswaarde is in en net onder die skil. Deur dit af te skil, gaan heelwat daarvan verlore. Die skil dra ook by tot die veselinhoud van die appel, wat beteken dat dit effens langer neem om te verteer en jou dus langer versadig sal laat voel.
http://jazzapple.com

Neute is gereeld deel van die kosblikke wat ons pak en daar is soveel verskillende soorte beskikbaar. Eet verkieslik die neute rou (ongerooster), want alhoewel geroosterde neute baie lekker smaaak, kan die proses van die voedingswaarde laat verlore gaan. Geroosterde neute word ook dikwels gesout en op die manier eet ‘n mens maklik aansienlik meer sout as wat nodig is. As jy glad nie van rou neute hou nie, is dit dan beter om rou neute te koop (dis sommer ook goedkoper) en dit self te rooster, want jy kan bepaal hoe lank dit gerooster moet word en dan hoef jy ook nie sout by te voeg nie.

Die verskillende soorte neute het elkeen hul eie mooi naam in Afrikaans. Die ATKV borg hierdie week weer vir ons ‘n mooi woord vir die kosblik en dié slag val die klem op die name van neute: makadamia, kasjoeneute, pekanneute, okkerneute, amandels en pimperneute is maar net van die bekendste neutname. Besoek gerus ook hul webwerf om te kyk na al die ander taalprojekte waarby die maatskappy betrokke is. Die ATKV is verder ook bekend vir die verskillende vakansieoorde waarby gesinne en families heerlik kan kuier. http://www.atkvoorde.co.za/

Resep

Voupakkies met roereier, spinasie en sampioene

Resep aangepas uit Cooking from the heart 2
Lewer 4 – 6 porsies

Roereier
8 Nulaid groot eiers of 5-6 ekstra-groot eiers
1 e (15 m) water per eier
sout en swartpeper na smaak
1 e (15 ml) olyf- of avokado-olie
3 e (45 ml) gekapte vars kruie, bv. origanum, pietersielie, dille of tiemie

Voupakkies (wraps)
2 t (10 ml) olyf- of avokado-olie
125 g sampioene, in skyfies gesny
2 groot handevol spinasie, in repies gesny
Volkoring-voupakkies (wraps) om mee voor te sit

  1. Roereier: Klits eiers met die water, sout en peper.
  2. Verhit olie oor matige hitte in ‘n braaipan (’n AMC 24 cm Chef’s Pan werk uitstekend) en skink die eiermengsel in.
  3. Laat die eiers eers effens begin stol voor jy dit roer. Roer versigtig met ‘n eierspaan tot die eiers net alles gaar is. Moenie die eiers te veel roer nie en moenie die pan te warm maak nie, dan word die eiers oorgaar en droog. Verlaag die hitte, indien nodig.
  4. Strooi kruie oor en hou eenkant.
  5. Voupakkies: Verhit intussen die olie in ‘n aparte braaipan. Soteer die sampioene tot gaar en roer die spinasie by. Verwyder dit van die hitte sodra dit sag, maar steeds heldergroen is.
  6. Skep van die sampioenmengsel op ‘n voupakkie, met roereier bo-op en vou toe. Sit warm of teen kamertemperatuur voor.

Kosblik 8 Mei 2017: Appelslaai

Kosblik 101

Spyskaart

JAZZ™ Appel-en-eierslaai met veelsydige slaaisous

Die wintermaande kom nader, maar dit is darem nog nie heeltemal te koud om ‘n lekker slaai vir middagete te geniet nie. Hierdie week se resep is ‘n maklike slaai met appel en eier en ‘n veelsydige slaaisous. Maak sommer van die begin af die slaaisous dubbeld of selfs driekeer, want daar is heelwat maniere om dit nog te gebruik.

Die vars bestanddele in die slaai is ‘n geurige kombinasie van elemente wat nou in seisoen is. Die slaaisous kom oorspronklik uit Cooking from the heart se derde resepteboekie en is ‘n goeie voorbeeld van ‘n tuisgemaakte slaaisous wat beslis gesonder is as meeste gekoopte opsies. As jy verkies, kan die kruie in die resep maklik aangepas word om dit elke keer bietjie anders te maak. Oorspronklik is tiemie of roosmaryn gebruik, maar vir hierdie slaai, is selfs Italiaanse pietersielieheerlik, omdat dit so lekker by eier en appel pas. Dis ook ‘n lekker kombinasie met die koljanderblare in die slaai.

Die fokus van elke kosblik en ook die resepte in Cooking from the heart, is ‘n gesonde leefstyl wat maklik is om te volg en vir die hele gesin kan werk. Elkeen van die resepte in die drie boekies fokus juis daarop en daar is ook heelwat ander inligting met praktiese raad en wenke om dit volhoubaar te maak. Die resepteboeke is al drie op hul webwerf beskibkaar en kan daar gratis afgelaai word: http://cookingfromtheheart.co.za/
Om so ver as moontlik met vars bestanddele te werk, is ‘n belangrike beginsel van ‘n gesonde leefstyl. Dit beteken dat jy weet wat in jou en jou gesin se etes ingesluit is en terselfdertyd kook jy met heelwat minder verwerkte produkte en dus aansienlik minder versteekte suiker, sout en onnatuurlike preserveermiddels – soos met hierdie slaaisous. Iets soos vars suurlemoensap is ideaal om kos mee te geur.

Seisonale bestanddele is altyd opwindend om mee te werk, want dit is maklik bekombaar en beslis geuriger as wanneer dit buite die natuurlike seisoen geëet word. JAZZ™ appels is nou beskibkaar en die natuurlike soet smaak van dié mooi appels is ideaal vir die slaai. Die bros tekstuur maak die slaai lekker krakerig en die appel is sappig genoeg, met ‘n pikante smaak om perfek te wees vir ‘n slaai. Appels is definitief nie net om heel te eet of as peuselhappie te geniet nie. Dit kan op verskillende maniere deelgemaak word van maaltye. JAZZ™ appels is een van die nuwe kultivars wat nou beskikbaar is, so soek gerus in die winkel vir die appel met die groen-geel skil en rooi streperige wange. http://jazzapple.com

Vandag se slaai is ‘n vegetariese ete, maar tog vullend, danksy die eiers, kekerertjies en ook avokado. Deur hierdie drie bestanddele te kombineer, is daar genoeg proteïene in die ete, veral danksy die eiers. Eiers is ‘n uistekende bron van hierdie belangrike voedingselement, maklik om gaar te maak en maklik om te verteer. Die kekerertjies en avokado bevat ook proteïene, maar dra ook by tot die koolhidrate en vesel in die maaltyd, plus die gesonde olies in die avokado en slaaisous. Al die voedselgroepe en noodsaaklike nutriënte is dus ingesluit.

Ek het al voorheen hardgekookte eiers in ‘n kosblik gepak, maar vandag is dit ‘n saggekookte eiers, sodat die loperige geel deel word van die slaaisous. Maar as jy glad nie daarvan hou nie, kan jy die eiers net ‘n paar minute langer kook om dit heeltemal hard te kook en so as deel van die slaai te gebruik. Vir ‘n saggekookte eier, is 4-5 minute genoeg. Onthou om die eiers dan net dadelik uit die kookwater te haal en in koue water te sit, om die gaarmaakproses te stop.
Nulaid voorsien eiers in verskillende groottes en daar is ook ‘n keuse van vryloop-henne se eiers en dié waarvan die omega-3 vlakke hoër is, omdat die henne se kos daarmee verryk word. Jy kan dus kies watter vir jou gesin die lekkerste is. Vir die slaai, kan jy reken op een eier per persoon, maar vir ‘n grootmens of selfs vullender ete, is twee eiers per persoon ook reg. Deur ekstra-groot eiers te gebruik, is die porsie ook reeds effens groter.
‘n Lekker wenk oor eiers: wanneer jy eiers uit die kartonhouer in jou yskas pak, moet dit steeds met die skerper punt na onder (soos dit in die kartonhouer gepak is) geberg word. Dit hou die natuurlike lugborrel in die groter ronding van die eier aan die ‘bokant’ en beskerm in die proses die eiergeel. Om meer hieroor te lees, kan jy Nulaid se webwerf besoek http://www.nulaid.co.za/

Onthou om altyd ‘n hele dag se etes in ag te neem, wanneer jy besluit hoe vullend middagete byvoorbeeld moet wees. As middagete jou groot ete van die dag is, gaan jy dalk meer eier en avokado in die slaai wil sit, maar as jy met aandete ‘n groter maaltyd eet, moet middagete vullend genoeg wees om jou tot dan versadig te hou, maar nie te swaar nie.

Ek het koljanderblare in die slaai gebruik en dit is vir my ‘n baie mooi Afrikaanse woord – daarom het ek dit ook as die woord van die week vir Kosblik gekies. Baie dankie aan die ATKV wat elke week vir ons ‘n koswoord borg. Koljander is waarskynlik meer bekend as die gedroogde saadjies wat in boerewors en ander vleisgeregte gebruik word. Dit is inderdaad dieselfde plant wat beide as krui en die sade as spesery gebruik word. Die twee smaak wel heeltemal verskillend. Koljanderblare staan ook as danja bekend en word veral in die Maleise koskultuur so genoem.

Die ATKV is natuurlik ook bekend vir die vakansieoorde waar julle heerlik kan ontspan. As jy en jou gesin daar kuier, moet julle beslis by die Koswerf-restaurant op die oord gaan inloer om lekker te gaan eet. Die spyskaart maak voorsiening vir elkeen in die gesin. http://www.atkvoorde.co.za/

Resep

Appel-en-eierslaai met veelsydige slaaisous

Lewer 4 porsies

Veelsydige slaaisous ( Cooking from the heart )
3 e (45 ml) olyf- of avokado-olie
2 e (30 ml) balsamiese of rooiwynasyn
1 e (15 ml) suurlemoensap
2 t (10 ml) gekapte vars pietersielie en tiemie
1 t (5 ml) matige mosterd
¼ t (1,2 ml) sout
swartpeper na smaak

Slaai
2-3 JAZZ™ Appels, met die skil, in repies gesny
1 avokado, in skyfies gesny
‘n groot handvol vars koljanderblare
2-3 selderystingels, in dun skyfies gesny
1 x 410 g-blik kekerertjies, gedreineer
60 ml (¼ k) sonneblomsaad, gerooster
3-4 Nulaid ekstra-groot eiers, saggekook

  1. Slaaisous: Meng al die bestanddele saam en geur met swartpeper.
  2. Bêre die slaaisous in ‘n skoon glasflessie in die yskas, dit sal vir 2 weke hou.
  3. Slaai: Pak die slaaibestanddele in lae in borde, kosblikke of ’n glasfles. Plaas die heel, afgedopte eier bo-op en sit voor met ‘n tuisgemaakte slaaisous. (Wanneer die slaai geëet word, kan die persoon die eier oopbreek.)

Wenke
1. Gebruik die slaaisous om hoenderborsies aan die been te kook. Verwyder die vel en oortollige vet en panbraai aan beide kante tot goudbruin. Skink van die slaaisous oor, verlaag die hitte, sit ‘n deksel op en prut 20 minute of tot gaar. Die slaaisous kan ook oor ‘n heel hoender geskink word, voor dit gerooster word.
2. Gebruik die slaaisous as marinade vir vis- of hoenderporsies, vark- of lamtjops. Braai oor die kole of panbraai soos in Wenk 1.
3. Meng van die slaaisous met botterskorsie, murgpampoentjies of ander groente van jou keuse en rooster in die oond teen 180 ˚C tot gaar.

Groot Ontbyt Kosblik 1 Mei: Mieliebrood

Kosblik 101

Spyskaart

Mieliebrood
JAZZ™ Appel
Biltong
Komkommer en groenbone

Kosblik is 50! Dis nogal ‘n mylpaal en ek hoop dat jy en jou gesin teen dié tyd al ‘n hele paar nuwe gunstelinge op jul tafel en in jul kosblikke het. Om dit te vier, gaan ons beslis iets bak, want dit bly gewild by baie Suid-Afrikaners. ‘n Partytjiekoek sou seker in orde gewees het, maar ons het in April ‘n wortelkoek gebak, so daarom het ek besluit om ‘n mieliebrood te bak vir hierdie week se kosblikke.

Mieliebrood is een van daardie eg Suid-Afrikaanse resepte en ek ken min mense wat nie daarvan hou nie. Warm uit die oond met ‘n skraapseltjie botter is darem maar lekker, of jy dit nou met braaivleis of ‘n ander ete geniet. En ás daar iets oorbly, maak dit die lekkerste roosterbrood die volgende dag.

Die resep kom oorspronklik uit Cooking from the heart se eerste resepteboek en as ‘n lekker variasie, het ek dit die keer met volkoringmeel gemaak. Daar is dus heelwat vesel in die brood en as jy ‘n lekker growwe mieliemeel gebruik, is daar selfs nog meer voedingswaarde in elke sny. Een van die belangrike beginsels van Cooking from the heart se filosofie om ons aan te moedig om ‘n gesonde leefstyl te volg, is om met produkte te kook en bak wat so min as moontlik verfyn is. Hoe growwer die mieliemeel, hoe minder verwerk is dit en dus bly meer van die natuurlike voedsaamheid behoue. Die resep word verder met karringmelk gemaak, wat ‘n baie lekker bestanddeel is om mee te bak, want dit gee die brood ‘n heerlike tekstuur, sonder dat te veel olie gebruik hoef te word. ‘n Mieliebrood kan soms nogal olierig wees en dit is nie vir my lekker nie. Die karringmelk is dus ‘n lekker alternatief. Vir nog sulke resepte en praktiese wenke om ‘n gesonde leefstyl te volg, kan jy http://cookingfromtheheart.co.za/ besoek of volg hul Facebook blad http://www.facebook.com/cookingfromtheheartsa

Saam met die karringmelk, is eiers ‘n baie belangrike bestanddeel vir hierdie mieliebrood se lekker tekstuur. Mieliemeel het nie soveel bindingsvermoë soos bv. koekmeel nie, so meer eiers is beslis nodig om alles saam te bind. Ek het drie van Nulaid se groot eiers vir die resep gebruik en die eiers dra natuurlik ook by tot die verhoogde voedingswaarde van die gebak. Eiers is regtig ‘n voedsame bestanddeel wat ek altyd in my kombuis het, want dis is so veelsydig, maklik om te gebruik en iets waarmee jy in ‘n oogwink ‘n maaltyd kan optower. Daar is nog heelwat maklike resep-idees, wenke en antwoorde op tipiese vrae oor eiers, wat op ‘n baie lekker leesbare manier op Nulaid se webwerf aangebied word. Gaan maak gerus daar ‘n draai as jy meer oor eiers, hul voedingswaarde en die regte maniere om dit gaar te maak, wil weet. http://www.nulaid.co.za/

Die mieliebrood is ‘n lekker afwisseling vir ‘n kosblik. Onthou om steeds die porsies (snye brood per persoon) te beheer en kies dan elemente om daarmee saam in te pak, wat steeds ‘n gebalanseerde kosblik gaan wees. Biltong is ‘n lekker vleiserigheid om in te pak, want dit kan net so óf op die brood geniet word. Kies biltong wat nie te sout is nie. Daarmee saam is ‘n verskeidenheid vars goed ideaal om ‘n vullende kosblik te hê. Komkommer, groenbone, klein tamaties of enige ander slaaibestanddele waarvan jou gesin hou, sal lekker wees.

Seisonale vrugte is natuurlik altyd ‘n wenner in ‘n kosblik. JAZZ™ appels is een van die nuwer kultivars wat nou in seisoen is en ideaal vir ‘n kosblik. Die appel kan net so ingepak of dalk in wiggies gesny word vir ‘n kind, maar moenie die appel skil nie, want dis juis waar baie van die voedingswaarde is. JAZZ™ is ‘n krakerige, ferm appel met ‘n mooi rooi skil. Die appel het ‘n geel-groen ondertoon en kenmerkende rooi strepies in die skil. Die sappige appel het ‘n pikante soet smaak en is regtig lekker. Eet die appel as deel van die maaltyd of geniet dit as peuselhappie deur die dag. http://jazzapple.com

‘n Pikante smaak, is ‘n baie akkurate beskrywing van die mooi rooi appel en ‘pikant’ dan ook die woord wat die ATKV hierdie week op Kosblik borg. Die woordeboek beskryf die woord as prikkelend, skerp, of wat deur iets ‘n besondere belangstelling wek. Nogal ‘n mooi beskrywing vir so ‘n mooi woord. So word ‘n Peppadew® in Afrikaans ‘n pikantrissie genoem, om dit spesifieke smaak te beskryf.

Die ATKV is natuurlik ook bekend vir hul vakansieoorde, so besoek hul webwerf om te kyk watter oord naaste aan jou is, as jy lus het om vir ‘n naweek iewers te gaan ontspan. http://www.atkvoorde.co.za/

Resep

Mieliebrood

Resep uit Cooking from the heart 1
Lewer 1 brood

1 k (250 ml) growwe mieliemeel
1⅓ k (330 ml) volkoringmeel
2 t (10 ml) bakpoeier
½ t (2,5 ml) cayenne-peper of paprika of na smaak
½ t (2,5 ml) sout
1¼ k (310 ml) karringmelk of maas
3 groot Nulaid eiers, geklits
¼ k (60 ml) olyf- of avokado-olie
1 x 410 g-blik geroomde suikermielies

  1. Voorverhit die oond tot 180 °C. Voer die bodem van ’n 1,5 liter-broodpan met bakpapier uit en smeer die pan liggies met olie.
  2. Plaas al die droë bestanddele in ‘n mengbak.
  3. Meng karringmelk, eiers, olie en suikermielies saam. Roer by die droë bestanddele tot goed gemeng.
  4. Skep die beslag in die broodpan en bak 45-60 minutes of tot ’n toetspen skoon uitkom.
  5. Laat vir ‘n paar minute in die pan afkoel en keer dan uit op ’n afkoelrakkie. Sit warm met botter voor of pak dit in as deel van ‘n kosblik.

Wenk
1. Rasper 2-3 murgpampoentjies en roer by die droë bestanddele. Roer ¼ k (60 ml) gerasperde cheddarkaas by die beslag of strooi die helfte daarvan bo-op, voor die brood gebak word.

Groot Ontbyt Kosblik 24 April 2017 - Filotert

Kosblik 101

Spyskaart

Filotert met spinasie, bone en feta
Vars groente soos klein tamaties, roket en ander slaaiblare
Neute en sademengsel

Volgende naweek is daar nog ‘n langnaweek – nie ‘n slegte gedagte nie. En wat is dan nou lekkerder as om dit met heerlike kos, vriende en familie te kan geniet? Vandag se filotert is ewe geskik vir ‘n kosblik of as ‘n lekker iets-te-ete vir die langnaweek.

‘n Souttert, quiche of ander gebak het dikwels ‘n deegkors, wat nogal baie swaar kan wees en heelwat koolhidrate tot die ete bydrae. Deur filodeeg te gebruik is daar beslis heelwat minder ‘deeg’ ter sprake. Maar baie mense is huiwerig om dit te gebruik, omdat hulle dink dis moeilik of dat baie kan verkeerd loop. Gelukkig is die teendeel waar, so volg net die resep hier onder noukeurig en kyk na die insetsel op #Kosblik, dan is dit sommer makliker. Gelukkig kan jy deur die loop van volgende week weer die skakel vir die insetsel ook op my Facebook-blad kry om weer te kyk hoe om te maak, sou dit nodig wees.

Soos voorheen gebruik ek die beginsels vir ‘n gesonde leefstyl uit Cooking from the heart, van Pharma Dynamics om hierdie week se kosblik só te beplan, dat daar iets uit elke voedselgroep is om dit gebalanseerd en voedsaam te hou. Spinasie en feta is ‘n bekende kombinasie vir ‘n tert en altyd baie lekker. As proteïen vir die kosblik, word eiers en bone gekombineer en alhoewel dit dalk ‘n minder algemene kombinasie van bestanddele is, is dit regtig lekker en ‘n slim manier om bone in jul etes in te sluit. Die filodeeg word ook in die resep met olyfolie gesmeer, in plaas van botter. Die olie is heelwat gesonder as botter en lewer dieselfde resultaat om die deeg bros en goudbruin te laat bak.

‘n Ander beginsel uit Cooking from the heart waaroor ons al voorheen gesels het, maar wat altyd belangrik bly, is om kos-etikette te lees. Dit is ‘n baie goeie gewoonte om aan te leer, om seker te maak dat jy weet wat in jul etes ingesluit word. Let veral op na die lys van bestanddele – dit word van hoog na laag gerangskik, met dit waarvan daar die meeste is, eerste op die lys. Dan is daar ook ‘n tabel met die voedingswaarde per 100 g of ‘n porsie van die produk. Dit maak dit maklik om twee produkte met mekaar te vergelyk. Vir meer besonderhede oor maniere om kos-etikette beter te verstaan, kan jy kyk na enige van die drie Cooking from the heart resepteboeke op http://cookingfromtheheart.co.za/.

Om die tert se vulsel saam te bind, gebruik ons vier ekstra groot eiers, sodat dit die ander bestanddele kan ‘dra’, sonder om te styf te wees. Die verhouding eiers tot melk is belangrik in ‘n souttert of quiche: gebruik ten minste 3-4 eiers vir elke 250 ml (1 koppie) melk, om die regte tekstuur te kry. Nulaid se eiers is wel in verskillende groottes beskikbaar, so as jy verkies om jumbo eiers te gebruik, kan jy 2-3 eiers gebruik. Onthou ook altyd om die eier-melkmengsel te geur. Iets soos neutmuskaat, paprika of selfs ‘n bietjie gerookte paprika is altyd lekker met eiers. As jy kruie verkies, is dit ook ‘n goeie keuse, bv tiemie of Italiaanse pietersielie. http://www.nulaid.co.za/

Vir hierdie tert het ek die droëbone vooraf gekook. Dit is glad nie moeilik nie – dit verg net ‘n bietjie beplanning, want die bone moet eers geweek en dan gekook word. Dit het die voordeel dat jy ‘n groot hoeveelheid vooraf kan kook en vries vir ‘n volgende ete. Bone vries uitstekend in die kookvloeistof en as jy dit in porsies of hoeveelhede vir ‘n gereg vries, is dit volgende keer net soveel makliker as jy dit wil gebruik. Dit is natuurlik ook ‘n baie meer koste-effketiewe manier om bone in jou etes in te sluit.
Daar is wel ‘n paar belangrike wenke as jy self bone gaan kook:
- Week die droëbone in ‘n groot genoeg houer met heelwat water, want soos die bone uitswel, moet daar steeds genoeg water wees. Begin met ten minste drie tot vier keer die hoeveelheid water as bone.
- Dreineer die geweekte bone en kook dit in vars water.
- Moenie enige iets by die water gooi nie, veral nie sout, koeksoda, asyn of ‘n ander suur (soos tamaties) nie – dit verhoed dat die bone sag word en maak dit melerig.
- Prut die bone oor ‘n lae hitte. As dit te vinnig kook, val die bone uitmekaar en word maklik pap.
- ‘n Wye verskeidenheid geurmiddels kan by die gaar bone gevoeg word.
- Die verskillende soorte bone kook nie almal ewe lank nie, maar as dit geweek is, gaan dit ten minste 1-2 ure stadig moet prut om gaar te word. Sommiges, soos gespikkelde boontjies, wat dikwels vir sop gebruik word, kan 2½ - 3 ure neem om sag te word.

Onthou dat bone van nature laag is in sout, so moenie in die versoeking kom om te veel sout in die filotert te gebruik en in die proses die ete te hoog in sout te maak nie, want daar is nog feta ook in die vulsel. ‘n Tert gebruik dikwels ham of spek, maar dit is baie hoog in sout, so die bone is ‘n baie lekker alternatief. Lees gerus meer oor bone op http://www.beans.co.za/.

Vir die laaste week in April borg die ATKV weereens ‘n woord. Vandag is dit die mooi Afrikaans vir ‘nutmeg’ – neutmuskaat. Verpakkings dui deesdae net die Engelse terme aan, maar as ‘n mens ‘n Afrikaanse resepteboek gebruik, gaan jy wel die woord neutmuskaat teëkom. Dan is dit handig om albei terme te ken en gemaklik te wees daarmee.

Dalk beplan jy en jou gesin om die komende langnaweek op ‘n ATKV vakansieoord te kuier. Gaan eet gerus by die Koswerf-restaurant en laat weet wat jou gunsteling-gereg was. http://www.atkvoorde.co.za/

Resep

Filotert met spinasie, bone en feta

Resep saamgestel uit Bone renaissance (van die DPO) en Cooking from the heart 1

6-8 velle filodeeg, ontdooi
olyfolie om deeg mee te verf
15 ml (1 e) olyf- of avokado-olie
1 ui, gekap
100 g babaspinasieblare of 2 groot blare, in dun repies gesny
suurlemoensap, sout en peper
4 ekstra groot Nulaid eiers
250 ml (1 k) melk
5 ml (1 t) neutmuskaat of paprika of 2,5 ml (½ t) gerookte paprika
250 ml (1 k) gaar witbone, bv cannellini-bone (sien wenk)
1 skyf fetakaas, in blokkies gesny

  1. Voorverhit oond tot 180°C.
  2. Plaas filodeeg op ‘n werksoppervlak en verf een vel met olyfolie. Plaas nog ‘n vel bo-oor en verf met nog ‘n bietjie olie.
  3. Voer ’n 26 cm-tertbak met die filo uit, sodat die punte oor die rand van die bak steek. Herhaal nou die proses met nog geverfde velle en plaas die lae oor mekaar, sodat die hele bak eweredig uitgevoer is.
  4. Verhit die 15 ml olie in ‘n groot braaipan (‘n AMC 24 cm Chef’s Pan werk goed). Soteer die ui oor matige hitte tot sag. Voeg spinasie by en soteer tot net sag en geur met suurlemoen, sout en peper.
  5. Klits eiers, melk en neutmuskaat saam en geur na smaak.
  6. Skep die bone met die spinasiemengsel en feta in die filobasis. Skink eiermengsel oor en bak vir 30-35 minute of tot die filo bros en goudbruin is en die eiermengsel gestol het.
  7. Sny in skywe en sit warm of teen kamertemperatuur voor.

Wenk:
1. Gebruik geblikte bone of kook die bone self. Week die bone oornag in genoeg water. Sit die bone met genoeg vars water, maar sonder enige sout, in ‘n kastrol en prut baie stadig, tot die bone gaar is. Dit neem sowat 1-2 ure, afhangend van die tipe bone. Kook sommer genoeg bone vir meer as een ete, want dit vries baie goed in die kookvloeistof.
2. Moenie enige iets by die bone se water voeg, soos koeksoda, asyn, sout of enige iets anders nie – dit verhoed dat die bone sag word. Sout en bestanddele soos tamaties moet eers by die gaar bone gevoeg word.